आर'नाइ

राव सिबिआरी(मेथाइ)
सुजुगिरि– मुश्री बिष्णुज्य'ति कछारी,
खनगिरि – जेवारी स्बर्गीयारी

रेकर्दिं खालार-- 01-07-2025

राव सिबिआरी
थुनलाइ सिबिआरी
हारि फुजिगिरि
नोंसोरनि जै जाथों
जै जाथों जै जाथों जै जाथों।

गोथार नोंसोरनि नाजानाया
जोंखोल नोंसोरनि हास्थाइनाया
जेबोलाबो जेरावबो जाफुंजोबथों।

बार मोदाया
बुहुमनि जिनिरखौ
        बुखारलांथों
बार हुंखाया
बुहुमनि दाखोरखौ
        बुखारलांथों।
____

समाय़ा नोंनि गुबै असेबोला(मेथाइ)
सुजुगिरि– मुश्री बिष्णुज्य'ति कछारी,
खालार- 24-08-1983
नाइजाब- खांखिनि दौलें
देंखो- एस स्बर्गीय़ारी
खनगिरि –

समाया नोंनि गुबै असेबोला
फैनांगोन नों रजे जोमै जानानै
रादाइया नोंनि जोंखोल गोथारबोला
फैथारनांगोन नों सानसे बार जानानै।

       आंनि जीउनि दाहा बोदोर
       गोर्बोखौ सुग्लाइहोनो
       आंनि जीउनि हांमा बोदोर
       गोसोखौ गोजोन होनो
       फैनांगोन नों रजे
                   अखा जानानै
       फैनांगोन नों रजे
                   दैसा जानानै।
-----

समाय़ना, नों आंनि(मेथाइ)
सुजुगिरि– मुश्री बिष्णुज्य'ति कछारी,
खालार- 24-08-1983
नाइजाब- खांखिनि दौलें
खनगिरि –

हौ- समायना, नों आंनि
     फागोलि, आजोली, दावमैना
हि- अनसुला, अनफाउरी
     आंनि जीउनि नों हायना।
हौ- गोर्बो आंनि, गोसो आंनि
     आंनि जीउनि सदबांसा
हि- असे नोङो आंगो नोङो
     आंनि जीउनि जीउ दैसा।

हौ- अनजाली नों आंनि
     मिजिं, हाबिला, आगोमा
हि- थैस थांस अराइ अराइ
     नों आंनि जीउ बिगोमा।
-----

जीउनि मोदाइ नों(मेथाइ)
सुजुगिरि– मुश्री बिष्णुज्य'ति कछारी,
खालार- 02-10-1983
नाइजाब- बारहुंखा
खनगिरि –

हि - जीउनि मोदाइ नों
      आंनि आदा
      नों आंनि जोनोम जोनोम।
हौ – खन्थाइ नों, मेथाइ नों
      नों आंनि गोसो मोदोम।

हौ – जीउनि देंखो नों
      आंनि स’ना
      नों आंनि जोनोम जोनोम।
हि – सोलेर नों, जीउमा नों
       नों आंनि गोसो मोदोम।

हौ – बार हुंखा फैय़ोबोला?
हि – नोंखौ आं बावनो हाया।
हौ – जोमै दाखा फैयोबोला?
हि – नोंखौ आं गारनो हाया। 

खन्थाइ नों........गोसो मोदोम।
सोलेर नों ........जोनोम जोनोम।

___